يا سلام ... كانت تبقى جنان

ياسلام لو تبقى الدنيا ماتش كوره

احبتى فى الله عليكم جميعا سلام الله ورحمته وبركاته

حديثى معكم اليوم عن

معشوقة الجماهير ...... الساحرة المستديرة

مش فاهم بصراحه دى كرة القدم ولا نانسى عجرم
على العموم مش فارقه

الرجال دلوقتى بتجرى ورا الاتنين - قصدى الذكور وليس الرجال

ربنا يهدينا جميعا ...

كرة القدم من المفروض انها رياضه للجسم وربما نتمادى ونقول انها رياضه للجسم والعقل - ده على اساس ان زيدان بيلعب بمخه -

ولكن اولا واخيرا هى مجرد لعبه
لها فوائد واهداف
ولكن اراها خرجت عن نطاق اللعب وهذا ليس موضوعنا ...
ولكنها فرضت نفسها فرضا واصبحت عند بعض الناس اهم من العمل ومن العبادات

ربنا يهدينا جميعا ....

وياسلام لو اتفتح موضوع الكورة امام اى شخص تجده ماشاء الله محنك وخبير
50 مليون محلل وخبير كروى والباقين كانوا لاعبين افذاذ ثم اعتزلوا واصبحوا محلليل

وانا بكتب الموضوع ده بما انى لاعب متقاعد وخبير كروى محنك يعنى هى هتيجى عليا وتقف

الاهلى حديد ... والزمالك نحاس - اى حاجه اهى كلها فلزات -
جميل الانتماء .. بس ياريت يكون من غير غباء
المهم ..

على الرغم من انى شايف ان كرة القدم حاليا اخطر من سلبيات كتير
بمعنى اخر اصبحت وسيله للتغطيه على سلبيات ومشاكل خطيره

لكن انا شفت فى اللعبه دى حاجات جميله جدا جدا
ياسلام لو نطبقها فى مجتمعنا وفى قطاعات العمل المختلفه

يعنى مثلا

ياسلام لو كلنا نعمل بروح الفريق ونشتغل بروح الفوز
ياسلام لو كلنا نتعاون من اجل هدف واحد نخلص بيه الماتش
ياسلام لو كل واحد يكون له مركز معين يجتهد فيه يطلع كل الى عنده من خلاله وكل واحد حسب تخصصه وفى نفس الوقت يساعد زملاءه فى تقديم افضل ما لديهم
ياسلاام لو يدقق المسئولون فى اختيار الحكام والمشرفين فى كل عمل زى ما بيحصل فى ماتش الاهلى والزمالك - بس مش عاوزين اجانب -

ياسلام لو يبقى الحكم ديما مفتح عينه وبلاش تفويت
ياسلام لو كان كل واحد يغلط ياخد كارت اصفر
ولو كرر نفس الخطأ متعمدا ياخد الاحمر
ياااه لو كل واحد يعمل مجهود وينجح يتم تكريمه بالقدر المستحق

ياسلام لو كل واحد يسرح مع نفسه ويخرج عن الجماعه نقول - اوفسايد - فوق يابنى انت واقف تسلل ..
ياريت كل واحد يلعب حلو - فى مجاله - نصفق له .. واى مقصر او متخاذل نقوله ييييييييه - مش عاوزينك - بدون مجامله ولا نفاق ولا خوف
يا سلام لو كل حكم - مسئول - نحس انه بايع ضميره نقوله - شيل الحكم وحط خروف - وبلاش نطنش احنا كمان ونقول انا مالى

ياسلام لو كل واحد يعمل معسكر مغلق ويتمرن ويتدرب ويستعد للعب - قصدى للشغل - من اجل الظهور بافضل شكل

ياسلام لو نخلص الماتشات قبل ضربات الجزاء ووجع الدماغ ده ولو حكمت يعنى نشترى الحضرى وهو هيقوم بالواجب
ياسلام لو يكون حرصنا على الفوز بكأس من معين يوم القيامه مثل حرصنا على الفوز بكأس افريقيا

ياسلام لو كل واحد يدخل ويقرأ الموضوع - مشاهد يعنى - ينزل من المدرجات ويشوووط - اقصد يقول - رأيه فى الرياضه بصفه عامه حاليا هل تفيد المجتمع ام انها تنخر فى اساسه؟ وما هى رياضته المفضله ولماذا يفضلها على غيرها ...

» اذا كانت الحياة لعبه ،، فهذه قواعدها